شكران مرتجى: تعبت شوف مسبات.. اذا غلي كيلو الكوسا بينسب السوري

هنأت الممثلة شكران مرتجى الفنانة اللبنانية نانسي عجرم وعائلتها بالسلامة جراء حادثة تعرّض منزل عجرم للسرقة حيث وجهت منشور عبر صفحتها في موقع التدوين تويتر معلقة، “أنا ضد الجريمة، أكيد ضد التعدّي عالآخرين، وانا بحب لبنان ورفقاتي أغلبهم لبنانيين غاليين ودايماً فاتحين قلوبهم مو بس بيوتهم وبحبهم كلهن كلهن”.

وأضافت شكران مرتجى “ما بيكفي عنصرية عند البعض، ما في حدا من جد جد جدك سوري والعكس، لك كل شي بيصير بسوريا بينعكس ع لبنان والعكس كمان، مو كل ما صار شي السوري بلبنان بدّو يتخبّا، مو حرام بيكون عنده علاج او سفر او شغل بيخاف يطلع بسيارته لتتكسر؟ ايمتى بدنا نطفي النار ما نشعلها؟ ايمتى بدنا نرحم بعض ليرحمنا الله؟ ايمتى بدنا نبطل تشفّي بوجع وجثث بعض؟”.

وتابعت في رسالتها الطويلة “انا مع العدالة ومع الحق بس مو مع التعميم. كم سنة عم نسمع ونقرا مسبات واهانات وتحقير ماحاج والله حاج والله حاج. في بسوريا فنانين ورسامين ونجوم ومصممي أزياء وكتاب وشعراء. لك نحنا بلد زنوبيا ونزار قباني وصباح فخري وميادة حناوي وأدونيس وفاتح المدرس ودريد لحام ونهاد قلعي ومالفا سهيل عرفة عبد الفتاح سكر منى واصف غادة السمان ألفت إدلبي كوليت خوري”.

وختمت شكران مرتجى بالقول “أكيد كمان أنا ما عم عمّم، عم أحكي ع اللي عم يحكوا، واذا غلطانة سامحوني بس تعبت شوف مسبات، اذا غلي كيلو الكوسا بينسب السوري، وأكيد ما بقبل بهالبوست وغيره ينشتم حدا من لبنان او اي بلد عربي، بس تعوا نحنا الفنانين المثقفين الواعيين المواقع الفنية الصحافة مو مشان سكوب نحط عنوان بيجرح ملايين لك ما بعرف اللي بيحب الله حاج نسب بعض”.

ونوّهت مرتجى أنها “ضد السرقة والقتل والاغتصاب وكل انواع الجريمة واللي عم يعملها بيمثل حاله مو شعب وكل السوريين مقهورين وبيزعلوا من هيك شي وانا مالي علاقة في محاكم وأمن وجهات مختصه مالي عم برئ حدا، همنا واحد وجعنا واحد، أدين اللص والقاتل ولا أدين جنسيته”.