فَجّر الفَنّان نيكولا معوض عن مُفاجَأة بأنّه تَمّ ترشيحه لبطولة فيلم “أصحاب ولا أعز”، ولكن اعتذر عن عدم المشاركة فيه لأسباب عَدّدها بنفسه عبر منشور طويل عبر “فيسبوك”. وشرح نيكولا كواليس انضمامه في البداية وتَعاقده بالفعل على البطولة، ولكن تَسَبّب تَعَطّل التصوير لأكثر من مرة لاعتذاره عن عدم المشاركة، لأنه كان قد ارتبط في تلك الفترة بعمل آخر استدعى سفره خارج لبنان.
وقال معوض، “يلّي متابعني منيح بيعرف إنو ما بحياتي اعتذرت عن دور وبعدين طلعت قلت (هيدا الدور كان إلي)… مع إني ما بلاقيها غلط، بالعكس بلاقيها شغلة كتير عادية وما فيها أي انتقاص لا من الدور ولا من الممثل يلّي أخد الدور”.
وتابع، “بَسّ اليوم، مع كل الجدل يلّي عم نشوفوا حول فيلم أصحاب ولا أعزّ، كتير حابب قول انو كان المفروض كون واحد من ممثّلي الفيلم… وكمان حابب قول انو سبب اعتذاري ما إلو علاقة أبداً بالجَدَل الجاهِل العَقيم يلّي عم نشوفوا حاليّاً”.
وعن سبب اعتذاره عن عدم المشاركة قال نيكولا، “اعتذرت لانو ظروف كورونا خلّت التصوير يتأجَّل أكتر من مرّة وكان عندي ارتباط مُسبَق بتصوير خارج لبنان، فا اضطرّيت انسحب من المشروع وأنا عارف مُسبَقاً اني كتير رح إزعَل لمّا شوف الفيلم”.
وأوضح نيكولا، “كنت مفكّر حالي رح إزعَل بَسّ لانو الفيلم فنيّاً كتير حلو كمان لأنّي كنت عارف مُسبقاً كيف رح يكون أداء كل إنسان اشتغل قدّام الكاميرا وورا الكاميرا تحت إدارة المخرج يلّي بحبّو كتير وِسام سمَيرة”.
وعن الجدل حول الفيلم، قال، “بَسّ اليوم لقيت حالي زعلان لأسباب تانية… زعلان لأنو هالفيلم كان رح يكون فرصة تخلّيني قول بالفعل مش بَسّ بالحَكي قدّيه الفَنّ أعلى وأسمى من كل القيود والأحكام والرقابات، وقدّيه للأسف نحنا عايشين بمُجتمع منافق مُزدوِج المعايير”.
كما أشاد بالأبطال قائلاً، “تحيّة من القلب لكل حدا اشتغل على هالفيلم ولكلّ إنسان مؤمِن بِفَنّ حرّ ومُستقِلّ. بعرِف رح يكون في كتير تعليقات سلبيّة… كان في ضَلّ ساكِت، بَسّ يلّي عم يتهاجَموا اليوم هنّي زُمَلاء وأصدقاء بحتِرِمُن، وكتير بحترم مشاركتُن بهالعمل، وواجب عليي وعا كل إنسان بفَكِّر متلناانو يوقف بصَفُّن. بعتذر سلف عن عدم الرَدّ “.
