كشفت الفنانة ياسمين صبري،على هامش مشاركتها في مهرجان البحر الأحمر السينمائي الدولي، المقام في مدينة جدة بالمملكة العربية السعودية، خلال الندوة التي أقيمت لها، عن رأيها في العديد من الموضوعات الفنية، وعلى وجه التحديد رأيها في المنصات الرقمية، والأدوار التي تتمنى تقديمها.
وأكدت ياسمين صبري أنها لا تميل إلى المنصات الرقمية: “في ناس في الدلتا والفلاحين والصعيد، مينفعش أقول لهم عشان تشترك ادخل على كذا وادفع بالفيزا كارت، أنا عاوزة الجمهور ده عنده تلفزيون، عاوزة أروح له ومش عاوزة أصعبها عليه، وبقلق من المنصات لأن الناس دي مش هتروح لها، وهما شريحة كبيرة جداً في مصر وعلى راسنا”.
تابعت: “بالرغم من التطور الشديد جداً للمنصات ولكن لسه فيه أماكن ما عندهاش رفاهية إنه يشترك علشان يتفرج وأنا مش عاوزة أكلف حد، وميزة التلفزيون إن أنت رايح له ببلاش وهتلاقي القهوة فاتحة قناة هوا، وأنا دقة قديمة”.
وعن الأدوار التي تتمنى تقديمها قالت ياسمين صبري: “الحاجات اللي بتتعرض عليا بتبقى أدوار مستوى راقي، ومملة بالنسبة لي، لكني نفسي أعمل شعبي، والمنتجين يشوفوني في الحتة دي وحتى لو ما شافونيش فأنا برضه هعملها”.
كما تحدثت عن أعمالها المقبلة، مشيرة إلى أنها ستركز الفترة المقبلة على السينما، وتحضر لفيلم جديد مع بيتر ميمي عن أول سوبر هيرو مصرية، مردفة: “الحمدلله أنا أملك ثقة كبيرة في عملي، وكل أعمالي السابقة حققت نجاحاً وإيرادات”.
ولفتت ياسمين صبري إلى أنها ليست ممثلة أفلام مهرجانات وأنها تعتبر نفسها نجمة شباك، ولا تعتبر التمثيل هو أساس حياتها، وأنها ابتعدت عن التمثيل العامين الماضيين وكانت تعمل على تطوير نفسها في مجالات مختلفة، وتتابع علوم الطاقة.
