- كلمات وإلقاء الشاعر: محمد حواس
- موسيقى: مروان انور
اتعلمتي وخدتي تجارب .. حواء
اتعلمتي وخدتي تجارب
خلّت عينك متدمعش
مهما الدمع فـ عينك حارب
رغم سكوتك ..
لما عنيكي فـ صمت بتسأل
كنت بجاوب
دايمًا كنتي بتبقي عليا
دايمًا ماسكة وكنت أنا سايب
رغم إن أنا قفلت أبوابي
قلبك ساب الباب متوارب
اتعلمتي وخدتي تجارب
…………………….
اتعلمتي وخدتي تجارب
واتغيرتي
مر الوقت وشكلي بيكبر
وأنتي صغرتي
والبسمه اللي بترسم وشك
بمرور الوقت بتتغير
والدمع اللي اتمكن منك
رافض حتى بأنه يجاوب
اتعلمتي وخدتي تجارب
…………………….
اتعلمتي وخدتي تجارب
واحلويتي
رغم قساوة الدنيا عليكي
عمرك يوم ما عليا قسيتي
رغم البعد ورغم الغربة
ورغم كلامهم عني وعنك
عمر ما همك
واستنيني
رغم بنات الدنيا بحالها
حضنك بس مكاني.. وبيتي
اتعلمتي وخدتي تجارب
واحلويتي
…………………….
وبرغم الدنيا وتفاصيلها
ووشوش الناس المهمومة
وعيون الناس الخوافة
وبرغم الدمعه اللي فـ عينك
على قد الوجع اللي مصاحبك
نزلت على خدك شفافة
معذورة الدمعة اللي في خدك
عمر ما كانت يوم متشافة
يا هربانة من الدنيا
بكل برود تفاصيلها فـ حضن النوم
يا ساجنة الضحكة جواكي
وحارمة الدنيا من الفرحة لباقي اليوم
يا واخدة مـ العشم صابرين
واحد عشان خاطري
والتاني للضالين
يا واخدة من الوجع سطرين
شوفيلك حد وحياتك
يلف العمر ف سجارتين
يا واخدة من النصيب مشوار
ومعرفتيش هياخدك فين
يا سرحانة في حلم قديم
ف قرآن ضهر يوم جمعة
وضحكة بنت بضفيرتين
وبرضو العمر أهو ساحبك
ومعرفتيش هياخدك فين
يا شايفاني بعيون قلبك
وناسية كل أحزانك
ومستنية يوم ما أرجع
عشان نفرح يا دوب أوقات
عملتي نصيبنا شماعة
رضيتي نتُوه مع المسافات
وقطر العمر عدى وفات
لكن ساب الوجع فيكي
كما فيا
مع الأيام قدر عايش
وقلبك م المطر والدمع
صبح مركب ورق بايش
قالوك صابه من بعدك عيار الحب .!
عيار الحب مش طايش
عيار الحب بيموت
وأنا فعلا بلا ديــه
بموت فيك
